議員配名導

近來留意到名牌導演為立法會候選人拍宣傳片，究竟，搵邊位好，以下，是我的推介：

．劉皇發→杜琪峰
──配搭完美，肯定能流露發叔的江湖魅力，不過，發叔又自動當選，大概會慳番幾百萬導演兼製作費，觀眾也無機會看發叔渣鎗扮酷，在煙圈之下談政綱。

．黃毓民→黃志強
──雙黃同樣粗中有細，亦黑亦白，我懷念的黃志強，當然是舞廳年代的黃志強，你想想，陳惠敏一角換上了黃毓民，一場練拳蒙太奇已經能令觀眾拍爛手掌，血脈沸騰，不過如今，一個信佛，一個信主，又夾唔夾得呢？

．霍震霆→張藝謀
──只因為今期這兩位傾得埋，何況大製作背後必須有大靠山，兩者合璧，我估張導演又可以暫停他的人文情懷，繼續施展他大紅大綠的魅力，我睇，霍先生雖然自動當選，也不會介意花少少錢，讓龍袍加身，吊埋威也呢。

．梁國雄→邱禮濤
──邱導演老早拍了梁耀忠，今次長毛選情告急，這位影壇長毛大概也應義不容辭，拔刀相助，只是兩人都有一頭長髮，大概應先搵搵有無洗頭水護髮素獨全力贊助，搞個獨家呈獻。

．葉劉淑儀→羅道邦
──搵張婉婷就是對不到題，似乎只是葉太過份一相情願，自以為有鍾楚紅、舒淇、張曼玉的影子，不如搵這位叫羅道邦的，雖然我都唔知是否真有其人，但相信只有這位羅姓導演才敢來一句「信有明天」。

．謝偉俊→王晶
──王晶雖然走商業路線，但早年的成功都算是計算準確，走位有道，今勻，謝律師捨尊貴而走旅遊，大有精心計算的味道，況且，要搞遮遮掩掩的通俗裸露，晶哥也有一手。

．陳淑莊→奚仲文
──永遠的中產時尚，企企理理，奚仲文搞形象又點會失手，就算故事未妥，條理欠順，奚導演應該都有法包裝靚靚，星味濃郁，只不過，小觀眾又永遠感覺虛虛空空，唔會捧場。

．曾鈺成→蔡繼光
──雖然兩人外型相像，但又唔好話我以貌取人，侮辱蔡導演，話哂兩人都曾以作育英才為目標，使命感強，只是，兩人講這一套又可能只做到另外一套，蔡導演的那套，叫撞板風流。

．何秀蘭→葉念琛
──橫掂都係孤君作戰，刀仔据大樹，倒不如試試以玉女包裝，搶搶年青人市場，一個唔覺意突然獲得千萬張票，也樂得有個千萬議員的額外稱號。

唉，玩完...但唔知點解，選舉報導都要加條尾巴，寫出同區有乜候選人參與，咁，不如，我話俾大家聽，我的候選導演還有徐克、許鞍華、王家衛、譚家明等等... 咁，又有無謂呢？