2009年6月10日

大愛

荷包時常莫水,又點會理解有錢人的大愛精神。

大慈善家捐完錢後又會跳進公仔箱,又跳又唱又雜技,出錢之餘更出力,手左支票交給右手錢箱,太太表叔阿仔契哥千金輪流來,左推右接,樂得一夜富豪獻醜大派對。而我,假如我是天水圍陳家大雄小朋友,滿心歡喜的捐出兩百元血汗零用,就只有瞪大眼睛看那與劉翔一樣步速的跑步字幕,似有似無,腳影難捉,此種等價交易、公平競爭,大概成為本土兒童學經濟科的第一講了。

近年怪事特別多,關於錢銀、關於香港富豪的交易數字更是撲朔迷離,一億學跳舞原來不離譜,二十幾億睇風水兼按摩也是份屬等閒,如此,余錦基何解每年頭痕頭痛而不叫城中富豪養少一個五奶、六奶,在手指尾一彈大概也可大大超出籌款目標。

可悲的,跑馬地一周三次送出的五百萬,我就算期期有幸扑中頭獎,原來也難以籌足水腳,搵人為我掘出一個生機洞。

2009年6月9日

超級電腦

旺角又有鏹水彈襲擊。未知曾特首在啟動「超級電腦」之後,還有無甚麼終極運算處理器呢?

神探話事齌,查案用右腦,就算蠢少少,都應該用下個左腦啊,點解特首、區議員一味卸膊「超級電腦」與「天眼」呢?我知政府中人鐘意講高新科技、講程序、講分工合作,但由上至下都迷信科學發展觀,咁遲早要在行人專用區放置地對空聰明導彈截擊,又或者,叫 Norman Foster 在行人專用區上裝置個一樓天幕上蓋,晚晚再搞射燈咏 mongkok,咁就勁過拉斯維加斯了,仲使驚澳門小埠呢。

我近來很怕睇新聞報導,見到政府官員的講話就把幾火,未必是因為我的六四燥火上升,而是官場新近流行了一套「交待」技倆,一堆廢話、一堆程序,永遠覺得記者應該收口、市民應該收貨。這幾年,我知道政府多個部門搵了國際級公關專人教授大官如何應對傳媒大眾,但成績如何呢?一聽已經知得一清二楚,人人講一套做一套,以為萬事都可推左推右,然後一套「我盡哂力」的嘴臉就是。

都係「做好呢份工」累事,不問收成,只為做好,變成最緊要京大人話我做得好,又或大報小報話我做得妙,此外呢?你記得這位是視民望如浮雲的大官嗎?那市民感覺如何,又真係 who care 呢,反正自我感覺良好,倒不如日日上京做show、或請傳媒老總飲茶巴結,咁就代表人人話你做得好了,豈不快哉。