筆戰風暴

金融風暴，報章編輯都突然變身特首，以解救老弱股民為己任，前一句「苦主」、後一句「不良銷售」、「迫死中小企」，其實，曾特首就話要搏一下浮雲民望，編輯們呢，又是否須要咁搏命呢？

事實上，銀行界亦已經開始睇唔過眼，準備展開新一浪行動，不是講回購雷曼，而是向廣大民眾狠心講句：「大佬啊，雷曼執笠關我鬼事咩，你估我無損失啊！」其實到如今，銀行突然收緊信貸，又話迫死業主、迫死中小企，如果唔係咁，到時左話清盤、右話破產，搞到自己蝕入肉，咁又點算呢。

你都知，匯豐跌一跌，整個香港都幾大鑊也。

其實莫講話銀行家，就算銀行小行的小職員都面臨壓力，人人被老顧客咒咒罵罵，甚至連自己親友的錢都蝕入肉蝕到底，但一時間，全球全港全部街坊都責罵銀行從業員，咁，又點算好呢。

管理局不管理，監察委員會不監察，到出事，曾特首竟然向銀行界發霉氣，有錢銀行家就算不顧顏面，也不得不顧一下發牌機制，這樣就不得不變成委屈家嫂，有苦自己知了。

賺錢時，你又無去讚下銀行職員眼光獨到，咁如今，你又想點呢？銀行大佬的反擊未知成功與否，且看這幾天的報館聖手們又會否突然文筆一轉，以強化香港金融體系、忍受短暫陣痛、捍衛自由市場來作文章主題了。