頒甚麼獎

香港地有兩種選舉頒獎最無聊。

其一，是媒體辦的甚麼最佳品牌、十大商號等，就算先不講媒體與廣告商的利益關係、檯底標價，我就認識到一班突變朝九晚五不停投票的特約投票人，鬼咩，老闆叫到，佢地竟然可以不務正業，不走出門面軟銷，只隱敝在舖後猛寫投票表格，這些鐵票既沒有附送蛇宴，又沒有月餅，只得回正常糧單，認真徙氣！

另外一種無聊選舉呢？我覺得是每年台慶夜的萬千星輝頒獎禮，比港姐更無建設，比兒歌金曲更圍內小圈，年年頒獎變成演員擦鞋大賽，作為觀眾，你只能看到大機構中的今期人事關係、合約長短，得獎與否其實與演技沾不上關係。

今日媒體，弊就弊在一味無腦跟進，把這種自我宣傳的頒獎禮大肆報導，無限放大，由合照攝位講起，又拉票，又感受，甚至講解甚麼是經理人約、部頭約，一連好幾個星期，大大攻佔娛樂版的重要位置，然後呢？得獎者來一兩粒眼淚、感激高層家人粉絲們，令人納悶的遊戲規則其實能與新城金曲頒獎禮相比，你話死唔死呢！

自問一下，大機構又幾咁尊重演員呢？以前都話有長壽的《K-100》講講演員心事、幕後英雄，甚至介紹一兩位特約演員的艱苦歲月，今時呢？你晚晚看《東張西望》看到甚麼呢？我就只見特約贊助商的語句經常出現，又變成商品記招大匯演，又或者演員假話廢話大雜匯，當然還有，爛Gag浪接浪。

四十一年了，電視娛樂其實變了很多很多，由深度娛樂走向喧嘩大眾，電子及平面各自參巧炒作，看電視竟然變成不須用腦袋思考的活動了，我知，電視台高層都會以收視點數定生死，已管不到理論書中媒體的訊息、責任與功能了。

作為觀眾，或者，你應該和我一樣，希望快D有全民直選啦！