清盤

香港品牌未見成功，香港製造業已陷入谷低，幾千家曾經足以自豪的港商面臨結業危機，近半年間，破產的破產、清盤的清盤、走數的走數。

當新聞焦點全都落在美國股市走上走落的畫面時，身邊更多失落的老板有苦自己知，幾年前，甚麼IPO都可以發其大財，幾年後，上了市的廠商更加是毫無退路，平治雖還在，金條疊金條，但銀行、原料商、欠薪工人一浪接一浪，又可以點樣？

我想說，是未有大頭不要戴大帽，我見過很多新上場的上市老闆以為唔駛再做的，以為學下李小超搞股技，學下李大超打下golf，再唔係就入入政黨、沾沾商會、摸摸公職，卻唔知上市後個人肩膀壓力大增，不是求求其其搵老婆仔女入局就能抵風擋雨。

透明度欠奉，基金佬股票佬都無人睇好，惟獨看風駛舵的財務公司愛上了你，一時按下股票、一時按下機器、一時按所豪宅，廠商其實也如同無知的信用卡消費少年。我想，如果這真是一個海嘯的話，那代表，不在乎你是精英還是百性，不在乎大小政府如何拯救、如何抵擋，死的終要白白死，生的也只不過是好彩而已。

天災啊。