事後

又出事。所謂出事，都只因為有媒體、有團體、有市民齊齊幫手作大聲公，發揮出民間力量，阻攔一下。

假如閣下期期看《便利》，早就應該被激到嘔血，這其實，很簡單，叫人性。假如讀者無乜人性呢，就會期期買這種垃圾刊物，看得興高采烈，還會暗拍手掌。早幾日，不是張張報紙還在登《斷背山》靚仔與女友的半裸度假照，這外電版、娛樂版的編輯又有無罪呢？

我不懂法律，不想指出邊個邊個應該坐監罰款，但總覺得作為人，應當擁有人應有的良知，即係洗腳布不能當鹹菜出售，紅藥水不可染西瓜，當街不能亂棒打人等等，只不過，目下是商業社會金錢話事，這種事原來真會發生，無法抑止，頂多最後有個小人物坐監判刑，大人物繼續搜尋法律罅隙、黑暗勾當。

一邊鬧，一邊看，我開始不明白世界背後的一條道理，在這個一秒間可搜尋到三、五、七千套網上性愛錄像的年代，八卦，還可以有市場，還可以變成利刃，城市人無時無刻依賴著話題去生活，我估，娛樂新聞台總會有一天趕過新聞台。

我問過一位《便利》的忠實讀者，一年52期，不知連續買了幾多年，女性，已婚，Marketing專才，即是日日西服高跟鞋，閒時又積極參與非牟利組織的義務工作，心地應該好到不得了。

我：點解咁喜歡《便利》？

她：抵睇，乜都有，好鍾意佢地有好多自助餐、食肆等資料，邊到買野平，邊到買好野，都有。

我：咁你又鍾唔鍾意佢地的故仔？即係封面果種，又或教男仔點樣網上呃女仔那些？

她：都好睇，好好笑。

我：咁那些叫幾個model在沙灘上互射豆奶的圖片呢，覺得點？

她：好呀，有些好抵死的，睇下，無壞呀。

這段對話發生在多年之前，實際字眼我記得不太清楚，也記不起我又否追問下去，但閒來的時候，我總會回想這位朋友的答案，她答的時候其實是充滿自信，不似我，收到朋友傳來的色情錄像電郵都看得鬼鬼祟祟，把視窗縮至最少最少。

時代變了，讀者變了。一雞未必死，另一雞卻必定鳴。