八下八下

大劉、李嘉欣、倪震、王維基，海嘯流流，就是靠這班人，把周刊雜誌界搞得有聲有色，大概好多老總都因這幾個大故仔的關係，而暫緩執行寫好了的裁員名單。

不是嗎？你看，本地「有人睇」的傳媒來來去去得個幾份，何解追訪以上幾個故仔的記者群如此龐大，守候駐紮地點又多，Video Cam、Digital Cam長短火傻瓜機各有特色，咪牌錄音機有線無線式式俱備，主播、記者、攝記、Cam Man、Sound Man有老有嫩，日又守住，夜又有人，這些那些，都算是海嘯逆市下的搏命員工吧。

你說傳媒太瘋顛嗎？

又不是，現在，富臨要有人、機場要有人、老蘭要有人、亞視門口又要人，所以作為採主，作為總編，其實無咁上下經驗與功力都會馬上頭痕，飛型記者未必識字，油條寫手未必在場，我實在真心拜服某些大機構娛樂組領班的領軍能力，一場又一場的鬥作鬥挖鬥大血戰，刀光劍影，勝負定案就在新一期的雜誌銷售數字，無花無假。

儘管有人會說盡娛樂雜誌的不是，但面對搏命員工，又面對八卦八到上腦的香港讀者，話唔睇，話唔睇，最後倪震一出，狗仔一咬，又會見到放工時乖乖排隊俾錢的忠實讀者。

真心講，有趣的，有趣不在於故事的真實性與否，而是在於編輯的想像力與街坊的八卦神經互相角力，空中對峙，你明知日日免費可以睇東張西望，多兩個錢又有幾條八到暈的娛樂新聞或甚麼資訊頻道台，究竟，怎樣令讀者每星期甘心放下十蚊廿蚊呢，說這挑戰性，實未必易過改革亞洲電視啊。

畢竟，大家知，要彌補海嘯下流失的三、四成廣告客，真唔易。

都話「共度時艱呀」，大家忍耐下呢，現實就是如此，得閒的話，就賣多兩本八卦雜誌，打償一下。