香港工展

香港工業半死不生，每個老闆都口口聲聲要自建品牌，風行全球，但實情又多是事如願違。

眼前工展會是一例，這些所謂香港名牌，跳得過羅湖邊境已屬萬幸，想跨洲跨國就堪稱妄想矣，因為香港工業人頭腦簡單兼閉塞，OEM的心態入血入骨，即係話，他們的支出與收入都是「逐件計」，懶理甚麼創意、甚麼品牌、或者甚麼推廣策略。

又即係，他們想創作一個創意廣告，打動消費者，但係計來計去都只容許創作人動用一支醬油銷售價的5%作為廣告成本，例如，十二元的醬油，撥六毫幾字作宣傳開支，咁就算年銷一百萬支的香港市場，最終都只得六十萬作廣告預算。

究竟有廣告開支先，還是有現金回流先呢？香港老闆永遠舉旗不定，咁又點開拓品牌呢。

又簡單一點來說，對於他們，設計一個產品標緻是一件既傷腦筋又無乜意義的事，與其給設計公司賺取一筆，倒不如叫老闆讀緊設計的親戚發揮天份，一畫而成，頂多回贈一千幾百，情況就如胡亂叫一大埋明星、朋友、靚太前來舖面開幕撐場，懶理甚麼市場分析、甚麼產品定位、或者甚麼企業形像。

這種老闆大部份身經百戰，靠學洋產品而自立門戶，靠關係攏斷而得市場，如今鬼佬已走，自己擔上大旗呢，就馬上縮皮修身節流，企業再不需有形像，產品再不要有定位，更不堪提甚麼R&D。剩低的，是半咸半淡的假鬼子商品名稱。

這一類的香港品牌，永遠不會為香港人爭光，頂多只會為老闆賺多一點銅臭。

對，又唔好賴工業人，皆因這一趨勢，肯定不止在工業圈子裡發生。